بابائے قوم قائداعظم دے وژن دی روشنی71 واں یوم آزادی صبحائیں قومی و ملی جوش تے جذبے دے نال منایا ویسی ڈینھ داآغازپورے ملک دیاں مسیتاں اچ خصوصی دعائیں تے وفاقی دارالحکومت اچ 31 توپاں ،صوبائی دارالحکومتاں اچ 21، 21 توپاں دی سلامی نال تھیسی

اسلام آباد ۔ 13 اگست (اے پی پی) بابائے قوم قائداعظم محمد علی جناحؒ دے وژن دی روشنی اچ مادر وطن کوں امن، ترقی اتے خوشحالی دا گہوارہ بنڑاونڑ دے پختہ عزم دی تجدید تے جمہوری تسلسل دا اہم سنگ میل پار کریندے ہوئیں 71واں آزادی دا ڈینھ اج منگل کوں قومی جوش جذبے دے نال منایا ویسی ۔ایں واری یوم آزادی خصوصی اہمیت دی حامل ہے جڈاں سنوار کوں ملک دی 15ویں قومی اسمبلی ، خیبرپختونخوا، سندھ اتے بلوچستان دیاں صوبائی اسمبلیاں دے نویں منتخب ارکان اپنڑے عہدے دا حلف چاتے تے نویں وفاقی تے صوبائی حکومتاں تشکیل دے چھیکڑی مرحلے اچ ہن۔ایں موقع تے ملک اچ عام چھٹی ہوسی ،ڈینھ دا آغاز ملک دیاں مسیتاں اچ فجر دی نماز دے بعد ملکی ترقی تے امن تے خوشحالی دے نال نال کشمیری عوام دی طویل جدوجہد دی کامیابی سانگے خصوصی دعائیں نال تھیسی ۔ڈینھ دے آغاز تے وفاقی دارالحکومت اچ 31 توپاں جڈاں جو صوبائی دارالحکومتاں اچ 21، 21 توپاں دی سلامی ڈتی ویسی ۔ سویل 8 وج تے 58 منٹ تے پورے ملک اچ سائرن وجائے ویسن تے 9 وجے وفاقی دارالحکومت اچ پرچم کشائی دی مرکزی تقریب تھیسی جڈاں جو پرچم کشائی دی تقریب صوبائی دا رلحکومتاں دے علاوہ آزاد کشمیر اتے گلگت بلتستان سمیت ضلعی ہیڈ کوارٹرز اچ وی تھیسی ۔ایں موقع تے ساریاں سرکاری تے نجی عمارتاں تے قومی پرچم لاتے ویسن تے ایندے علاوہ بہوں ساریاں عمارتاں تے لائٹاں لاونڑ دا وی خصوصی اہتمام کیتا گے ۔ صدر مملکت، وزیراعظم اتے اہم شخصیات ولوں ڈینھ دی مناسبت نال خصوصی پیغام جاری کیتے ویندے پن ۔الیکٹرانک میڈیا تے خصوصی نشریات دا اہتمام جڈاں جو پرنٹ میڈیا وی خصوصی اشاعتاں دا اہتمام کیتا گے۔ ایندے علاوہ باہرلے ملک پاکستانی مشن اچ وی پرچم کشائی دی پر وقار تقریب دا انعقاد تھیسی ۔ایں موقع تے قومی ترانہ وجایا ویسی تے یوم آزادی دے حوالے نال صدر مملکت تے وزیراعظم ولوں جاری کیتے گے پیغام پڑھ تے سنڑائے ویسن ۔ایں موقع تے پاکستانی سفیر/ہائی کمشنرز افسران تے کمیونٹی ارکان نال خطاب اچ تحریک پاکستان کوں اجاگر تے سکولاں دے بال معروف قومی نغمے، ٹیبلوز اتے لوک رقص پیش کریسن۔8 توں 14 اگست تئیں منائے ونجنڑ آلے ”ہفتہ جشن آزادی دی تقریبات“ دی مناسبت نال پورے ملک اچ سیمینارز، کانفرنسز، تقریری مقابلے ، قرات اتے نعت خوانی دے مقابلے، مشاعرے تے بیاں خصوصی تقریباں دا سلسلہ وی جاری اے ۔ایندے علاوہ پاکستان دی مسلح فوج ولوں یوم آزادی دی تقریبات وی انہاں دی اپنڑی تابندہ روایات اتے طے کیتے گے پروگرام دے مطابق منعقد کیتیاں ویسن ۔ وزارت اطلاعات، نشریات و قومی تاریخ و ادبی ورثہ وی یوم آزادی قومی جوش و جذبے دے نال مناونڑ سانگے ا نتظامات کیتن۔ ڈینھ دی مناسبت نال پاکستان ٹیلی ویژن کارپوریشن اتے شالیمار ریکارڈنگ کمپنی دے چینل اے ٹی وی توں طویل دورانیے دی خصوصی نشریات پیش کیتیاں ویسن جڈاں جو قومی خبر رساں ادارہ ایسوسی ایٹڈ پریس آف پاکستان (اے پی پی) یوم آزادی دی تقریبات دے سلسلے اچ تھیونڑ آلے مختلف پروگراماں، سیمینارز، مباحثے تے ٹاک شوز دی کوریج سانگے جامع انتظامات کیتن ۔